Stipendiya kimga, qancha to‘lanadi? “Kontrakt”da o‘qib ham stipendiya olish mumkin
Odatda ko‘pchilik bu masalaga e’tibor qaratmaydi. Biroq amaldagi tartibda talaba-yoshlar uchun qator rag‘batlantirishlar belgilangan.
Misol uchun, oliy o‘quv yurtida 1 va 2-guruh nogironligi bo‘lgan o‘zlashtirayotgan talabalarga stipendiyaning bazaviy miqdoriga nisbatan 50 foiz yuqori (oshirilgan) miqdorlarda stipendiya tayinlanib, to‘lanishi kerak.
Albatta, bu o‘rinda jismoniy imkoniyati cheklangan yigit-qizlar o‘zlashtirayotgan talaba — bundan avvalgi o‘quv semestri uchun o‘zlashtirish (reyting nazorati) ko‘rsatkichlari bo‘yicha akademik qarzi mavjud bo‘lmagan talaba bo‘lishi talab etiladi.
Umuman, oliy ta’lim muassasalarida o‘quv semestri yakuni bo‘yicha fanlarni o‘zlashtirayotgan, alohida qobiliyat va iqtidor egasi bo‘lgan, jamoat ishlarida faol, shuningdek, ijtimoiy himoyaga muhtoj talabalarni moddiy qo‘llab-quvvatlashni tashkil etish uchun Talabalarni rag‘batlantirish jamg‘armasini tashkil etishga rozilik berilgan.
Jamg‘arma mablag‘lari oliy ta’lim muassasalarida stipendiya to‘lovlari uchun rejalashtirilgan byudjet mablag‘lariga nisbatan 10 foiz hamda to‘lov-kontrakt bo‘yicha rejalashtirilgan tushumlarning 2 foiz miqdoridagi mablag‘lar hisobiga shakllantiriladi.
Ushbu mablag‘ hisobidan oliy ta’lim muassasalarida to‘lov-kontrakt asosida ta’lim olayotgan (stipendiyali yoki stipendiyasiz shaklda ekanligidan qat’i nazar), o‘quv semestri yakuni bo‘yicha fanlardan o‘zlashtirish ko‘rsatkichlari «a’lo» bo‘lgan talabalar stipendiyaning bazaviy miqdoriga nisbatan 20 foiz miqdorida rag‘batlantiriladi.
O‘quv semestri yakuni bo‘yicha fanlarni o‘zlashtirayotgan, alohida qobiliyat va iqtidor egasi bo‘lgan, jamoat ishlarida faol, shuningdek, ijtimoiy himoyaga muhtoj davlat granti va to‘lov-kontrakt asosida ta’lim olayotgan barcha talabalar belgilangan stipendiyalarga nisbatan qo‘shimcha ravishda Jamg‘arma mablag‘lari hisobiga 50 foizgacha miqdorda rag‘batlantirilishi mumkin.
Darvoqe, stipendiya to‘lovlariga ajratilgan respublika byudjeti mablag‘larining hisobot davri yakuni bo‘yicha bo‘shab qolgan qismi talabalarni qo‘shimcha ravishda moddiy rag‘batlantirishga yo‘naltiriladi.
Saytimizni kuzatib boring, mavzuga yana qaytamiz.
