Zimmasidagi vazifalarni bajarmaydigan amaldorlar endi kechirilmaydi!
Bugun mamlakatimiz fuqaro aviatsiyasi, temir yo‘llar yo‘nalishlarida ishni tashkil etish holati hamon eskicha uslubda qolib ketmoqda. Avtomobil yo‘llari holati ham talab darajasida emas.
Bu esa aholining haqli e’tirozlariga sabab bo‘layotir. Qolaversa, respublikaning tranzit va yuk tashish salohiyatidan samarali foydalanilmayotgani ham achinarli holat.
28 yanvar kuni O‘zbekiston Respublikasi Prezidenti huzurida transport sohasida amalga oshirilayotgan islohotlar natijadorligi tahlillariga bag‘ishlangan yig‘ilishda sohadagi bir qator shu va shu kabi kamchiliklar qayd etilgan edi.
Vazirlar Mahkamasining kuni kecha qabul qilingan “Ayrim rahbarlarning shaxsiy mas’uliyatini ko‘rib chiqish to‘g‘risida”gi qaroriga muvofiq O‘zbekiston Respublikasi transport vazirligi tarkibidagi tuzilmalar rahbarlariga yo‘l qo‘ygan ana shunday kamchiliklari uchun tegishli choralar ko‘riladigan bo‘ldi, deb xabar berdi O‘zA.
Jumladan,
- transport vazirining birinchi o‘rinbosari Ilxam Maxkamov, vazir o‘rinbosari Davron Dexkanov;
- vazir o‘rinbosari — Avtomobil yo‘llari qo‘mitasi raisi Abduraxman Abduvaliyev;
- vazirlik huzuridagi Fuqaro aviatsiyasi agentligining direktori Tolib Uljayev;
- vazirlik huzuridagi Temir yo‘llarda yuk va yo‘lovchilar tashish xavfsizligini nazorat qilish inspeksiyasi boshlig‘i Doniyor Axmedov;
- vazirlik huzuridagi Yo‘l qurilish ishlari sifatini nazorat qilish inspeksiyasi boshlig‘i Faxriddin Salixov egallab turgan lavozimlaridan ozod etilib, ushbu vazifalarni vaqtincha bajaruvchi etib tayinlandi.
Bulardan tashqari, “O‘zbekiston temir yo‘llari” aksiyadorlik jamiyati boshqaruv raisi Xusnutdin Xasilovga nisbatan ham xuddi shunday chora qo‘llanildi.
“Uzbekistan Airways” aksiyadorlik jamiyati boshqaruvchisi vazifasini bajarib kelayotgan Baxtiyor Xakimovning esa egallab turgan lavozimiga loyiqligi masalasi ko‘rib chiqiladigan bo‘ldi.
Albatta, zamon bugun har bir rahbardan yangicha, islohotlar shiddatiga mos ishlashni talab qilmoqda. Zimmasidagi vazifalarni bajarmaydigan amaldorlar endi kechirilmaydi!
