Cho‘l burguti "Zarafshon" milliy tabiat bog‘iga topshirildi
Samarqand tumanining Jo‘yisoy mahallasida yashovchi B.Qurbonov xonadoniga kelib qolgan yovvoyi qushni asrab qoldi. So‘ngra bu haqda Tabiat resurslari vazirligining Samarqand viloyati boshqarmasiga ma’lum qildi.
Boshqarma xodimlari aytilgan manzilga borib, ushbu qush cho‘l burguti ekanligini aniqlashdi.
Cho‘l burguti O‘zbekiston Respublikasi "Qizil kitobi"ga kiritilgan bo‘lib, qisqarib borayotgan tur hisoblanadi.
Cho‘l burguti veterinar ko‘rigidan o‘tkazilib, vaqtincha saqlab turish uchun Tabiat resurslari vazirligi tasarrufidagi "Zarafshon" milliy tabiat bog‘iga topshirildi.
Qush tez orada tabiat bag‘riga qo‘yib yuborilishi rejalashtirilyapti.
