Dunyoda qaysi kasb egalari eng ko‘p maosh oladi?
Bola maktabni tugatgach, ota-onalar unga nufuzli, talabchan va albatta, yaxshi maosh to‘lanadigan kasbni berish haqida o‘ylay boshlaydilar. Mehnat bozori har yili keskin o‘zgarib turishi bois, endilikda qachonlardir nufuzli hisoblangan kasblar o‘z ahamiyatini yo‘qotib bormoqda. Ularning o‘rnida IT-mutaxassislar, menejerlar, marketolog yoki reklama mutaxassislari kabi yangi kasblar kirib kelmoqda.
Ushbu maqolada so‘nggi yillar ma’lumotlariga ko‘ra dunyodagi eng ko‘p haq to‘lanadigan kasblar reytingi keltirilgan.
O‘simliklar sohasi seleksionerlari va genetik muhandislari: yillik maoshi - 97 560 AQSh dollari
2050 yilga borib dunyo aholisi 9,4 milliard kishiga yetishi to‘g‘risida bashoratlar qilinyapti. Yer aholisining doimiy o‘sib borishi tufayli sayyorada o‘ta muhim - ochlik muammosi paydo bo‘lishi ehtimoli juda katta, deydi olimlar. Hatto hozirda ham kam rivojlangan mamlakatlarda oziq-ovqat mahsulotlarining keskin tanqisligi ham sir emas. Yerning kerakli miqdorda o‘simlik ozuqasini yetishtirish qobiliyati aholining o‘sish sur’atlaridan ancha orqada ekanligini hisobga oladigan bo‘lsak, o‘simliklar sohasi seleksionerlari va genetik muhandislari kelajakda juda kerakli bo‘lib qolayotir.
Reklama menejeri: yillik maoshi - 100 020 AQSh dollari
Zamonaviy dunyoda faqat sifatli mahsulot ishlab chiqarish yetarli emas. Turli xizmatlar sonining faol o‘sib borishi bozorda har bir alohida mahsulotni ilgari surishning o‘ziga xos va jonli usullarini topish zaruratini talab qiladi. Bu kasb egalari boshqalardan farqli o‘laroq, yangi tasvirli ijobiy imij yaratmog‘i va uni xaridorga yetkaza olmog‘i darkor, shunda odamlar bu mahsulotlarni sotib olish haqida o‘ylab o‘tirmasdan, darhol bu ishni amalga oshiradi. Aslida “Reklama menejeri” ixtisosligi shunday paydo bo‘lgan.
IT-mutaxassisi: yillik maoshi - 100 110 AQSh dollari
Zamonaviy dunyoda barcha jabhani kompyuter texnologiyalari va axborot nazorat qiladi. IT-mutaxassislari dasturiy ta’minotni ishlab chiqish bilan birga, tizimlarni xakerlardan himoya qilish va muhim ma’lumotlarning sizib chiqishini oldini olish bilan shug‘ullanadi. Bu mutaxassislik ortida insoniyatning butun texnologik kelajagi yotadi.
Huquqshunos: yillik maoshi - 110 590 AQSh dollari
Ular o‘z faoliyatlari bilan nafaqat jismoniy shaxslarga, balki qonun normalariga rioya qilishlari lozim bo‘lgan yirik kompaniyalarga ham foydasi tegadigan kasb egalaridir. Barcha huquqiy nizolarni tartibga solishda aynan huquqshunoslarning xizmati bor. Ularning aralashuvisiz zamonaviy dunyoda hech qanday shartnoma tuzilmaydi, hech qanday hujjat imzolanmaydi va katta bitimlar amalga oshirilmaydi.
Uchuvchi: yillik maoshi - 134 090 AQSh dollari
Havo transporti mashhur va tezkor bo‘lganligi sababli, samolyot boshqaruvchi mutaxassisligi dunyodagi eng yuqori haq to‘lanadigan va nufuzli kasblardan biri hisoblanadi. Kasb aniq ko‘nikmalar, psixologik tayyorgarlik va boshqa odamlarning hayoti uchun mas’uliyatni talab qiladi. Asta-sekin uchuvchisiz samolyotlar paydo bo‘lmoqda, hali ular tirik odamlarni siqib chiqarmaguncha, bu kasb egalari har doim hurmatli va foydali bo‘lib qoladi.
Anesteziolog: yillik maoshi 162 080 AQSh dollari
Chet elda shifokor lavozimi juda nufuzli va anesteziya bo‘yicha mutaxassislarga katta maosh to‘lanadi. Anesteziolog nafaqat operatsiya vaqtida behushlik dozasini tayinlaydigan shifokor, balki operatsiya vaqtida ham, operatsiyadan keyingi davrda ham bemorning xavfsizligini ta’minlaydigan mutaxassisdir. Shuning uchun ularning mehnati yuqori ish haqi darajasiga munosibdir.
B.Muhammadiyeva tayyorladi.
