Festival-2021: SamVMIda eng iqtidorli yoshlar jamlandi

Samarqand veterinariya meditsinasi institutida “Yoshlar festivali - 2021” doirasidagi tadbirlar madaniyat, sport, texnologiyalar va ta’lim yo‘nalishlarida tashkil etildi.

Jumladan, a’lochi, iqtidorli, salohiyatli va sportchi talaba-yoshlarni rag‘batlantiruvchi “Munozara - debat”, biologiya fani bo‘yicha "Viloyat hokimi fan olimpiadasi”, sportning futbol turi bo‘yicha musobaqalar bo‘lib o‘tdi. Unda Samarqand shahridagi 10 ta OTMlari jamoalari faol ishtirok etdi. 

“So‘z erkinligi” yoshlarga qanday imkoniyatlarni taqdim etishi mumkin? Talabalarning aksariyat qismi qiziqayotgan zamonaviy yo‘nalish - blogerlikda bu imkoniyatdan to‘g‘ri foydalanilyaptimi?

Yoki yosh oilalarda ajrimlarning ko‘payayotgani sababi ijtimoiy tarmoqlarmi?

O‘zbekiston tashqi siyosatining qaysi jihatlari talaba-yoshlarga ma’qul yoki aksincha...

“Yoshlar festivali” doirasidagi munozara - debatda bugun talaba-yoshlar shu kabi muhim mavzularda bahs-munozaralar olib bordi.

Qizg‘in bahslarda SamVMI yoshlari birinchi o‘rinni, SamDAQI talabalari ikkinchi o‘rinni, TDIU Samarqand filiali jamoasi uchinchi o‘rinni qo‘lga kiritdi.

Festival doirasidagi tadbirlarning yana biri – OTM jamoalari o‘rtasida tashkil etilgan futbol musobaqasidir. Musobaqada  oliy ta’lim muassasalarining 10 ga yaqin jamoalari o‘z mahoratlarini namoyish qildi.

Uzoq davom etgan bellashuvlarda ta’lim muassasalarining sportchi yoshlari g‘oliblik uchun kurash olib bordi.

Gulchehra Berdiyorova.