Tramp saylovlarda g‘alaba qozonsa, qanday qilib Ukraina mojarosini bir kunda hal qilishini aytdi

AQShning sobiq prezidenti Donald Tramp Fox News telekanaliga bergan intervyusida Ukraina mojarosini 24 soat ichida tugatish rejasini tushuntirdi.

"Bilasizmi, men Putin bilan juda yaxshi munosabatdaman. Men unga: "Sen buni bartaraf qilishing kerak", degan bo‘lardim. Zelenskiyga: "Buni hal qilishing kerak" derdim. Bittasiga bir talay pul olishini, boshqasiga pul olmasligini aytgan bo‘lardim. Men 24 soat ichida kelishuvga erishgan bo‘lardim”, deb tushuntirgan sobiq prezident.

Tramp ta’kidlaganidek, Ukraina mojarosi "hech qachon sodir bo‘lmasligi kerak edi". U Rossiya va Ukraina o‘rtasidagi to‘qnashuvlarning halokatli xususiyatiga ishora qilib, ularni zudlik bilan to‘xtatishni o‘z vazifasi deb bilishini qo‘shimcha qiladi.

"Hozir sizda yuz minglab qurbonlar, ko‘plab vayron bo‘lgan shaharlar bor. Men bilmadim, siz raketa hujumlariga uchragan shaharlarni ko‘rganmisiz. Bu juda dahshatli", - deya xulosa qilgan Tramp.